رواية زوجه محرمه الفصل الرابع 4 بقلم خالد كمال
٤
الحلقة الرابعه
قعدت افطر مع سارة واحنا ساكتين وانا بفكر اذا كانت اول ليلة عدت بصعوبة كدة من غير نوم اومال باقي الليالي هتعدي علينا ازاي وانا وهي نايمين في اوضة واحدة لوحدنا !!!!
بعد الفطار خرجت سارة علشان تقعد مع ابنها شوية وانا ماصدقت بقيت لوحدي وعرفت انام .
امي قالت لسارة : اقعدي يا حبيبتي مع ابنك شوية بس متنسيش جوزك اللي نايم جوه مستنيكي .
سارة : طبعا يا ماما اصل وحيد وحشني اوي اول ليلة ينام بعيد عني .
: ربنا يخلهولك يا حبيبتي وتفرحي به . بس انا شايفاكي يا عروسة مش باين عليكي الفرحة زي العرايس !! هو امير عامل معاكي ايه ؟؟
: الحمد لله .
: ايوه الحمد لله طبعا علي كل حاجة ، انا عاوزة اعرف امير زعلك في حاجة ؟
: لا ابدا .
: يعني هو كويس معاكي ؟
: ايوه الحمد لله .
: اومال مش باين عليكي ليه ؟
: هيبان ازاي يا ماما ؟ ما انا كويسة اهو .
: يارب تكونوا كويسين فعلا و يكون احساسي غلط . انا داخله المطبخ اعمل اكل للغدا .
: استني يا ماما انا جاية معاكي .
:لأ خليكي مع ابنك شوية وبعدين ادخلي لجوزك .
: هجيب وحيد يقعد جنبا في المطبخ .
دخلوا الاتنين المطبخ ومعاهم وحيد ، لكن امي كان قلبها مش مطمن وكملت كلام مع سارة وقالتلها : بصي يا سارة انا عندي ٤ بنات وبعتبرك البنت الخامسة .
: ربنا يخليكي يا ماما وانا كمان بعتبرك زي ماما بالظبط من يوم نا دخلت بيتكم لما اتجوزت نور الله يرحمه .
: هقولك كلمتين يمكن مش قولتوملك لما اتجوزتي نور بس دلوقتي لازم اقولهوملك ، نور الله يرحمه مات وانتي دلوقتي جوزك امير وهو له حقوق عليكي زي ما انتي ليكي حقوق عليه .
: طبعا يا ماما .
: عايزاكي مش تقصري في حقوقه وهتلاقيه احسن رجل في الدنيا ، انا عارفه امير ابني كويس طيب وابن حلال ، املي عينه كويس علشان مش يبص بره ، الست الواعيه اللي تريح جوزها وتملا عينه ، فاهماني .
: ايوه يا ماما فهماكي ، وفاهمه كمان حقوقي وحقوق جوزي عليا .
: متزعليش مني يا سارة انا لازم اقولك كده علشان حاسة ان في حاجة غلط هي ايه مش عارفه .
: حاجة غلط زي ايه ؟
: مش عارفه يا سارة ، بس انتي شكلك مش شكل عروسة يوم صباحيتها !!
: بيتهيألك بس يا ماما ، احنا كويسين اوي .
: ولا يكون هو اللي ..
: اطمني يا ماما احنا كويسين زي اي اتنين متجوزين .
: يارب يا بنتي .
بعد كده امي سابت سارة في المطبخ ودخلت اوضتي وانا كنت نايم ، قفلت باب الاوضة و صحيتني وقالتلي : امير ، اصحي يا امير عاوزاك في حاجة .
: ايوه يامه خير في ايه ؟
: انت عامل ايه مع عروستك ؟
: ده سؤال بالذمة يامه !!
: طمني يا بني ، عاوزة اطمن عليكم .
: كويسين يامه الحمد لله .
: يعني انتو كويسين مع بعض .
: ايوه يامه .
: اومال مش باين عليكم ليه ؟
: عاوزانا نعمل ايه يامه !! نقوم نرقصلك علشان تعرفي اننا مبسوطين !!
: اوعي تكون مقصر مع عروستك يا امير ؟
: ايه يامه الكلام اللي بتقوليه ده !!
: انا بس عاوزة اطمن عليكم .
: اطمني يامه روحي بقي سبيني انام .
: اوعي يكون الكلام اللي كان في دماغك قبل الجواز لسه مقصر عليك يا امير ؟!!
: يامه قولتلك اطمني اعمل ايه تاني !!
: خلي بالك يا بني الرجل اللي بيقصر مع مراته بيعيشها في جحيم وممكن يخليها تعمل الغلط .
: يامه ملوش لزوم كلامك ده ، اطمني احنا كويسين اوي روحي بقي علشان اعرف انام شوية .
بعد شوية حسيت بسارة دخلت الاوضة وقفلت الباب وقعدت .
قومت بسرعة وقولتلها : في ايه يا ام وحيد ؟
: ماما الحاجة كل شوية تقولي ادخلي لجوزك ادخلي لجوزك دخلت علشان اريحها ، بس والله حاولت اني مش اقلقك .
: ايوه عارف ، اصل انا نومي خفيف اوي وبصحي بسرعة .
: طيب انا خارجة علشان تعرف تنام .
: لأ خليكي انا نمت حوللي ساعتين كويسين اوي ، معلش بقي نمت علي السرير كونت خايف امي تدخل تشوفني نايم في الارض .
: عادي ميهمكش . تحب تتغدا ولا تستني شوية ؟
: نتغدا احسن دلوقتي .
: طيب قوم صحصح كده علي ما اجيب الغدا .
: لأ احنا نخرج نتغدا مع الحاجه احسن .
: هي مصممة نتغدا في اوضتنا الاسبوع ده كله .
ضحكت وقولتلها : ماشي مفيش مشكلة .
دخلت اخدت شاور وخرجت لقيت امي مجهزلنا فطير وبط وحمام ، ضحكت : اهو ده اكل العرسان صحيح .
بعد الغدا خرجت بمجرد مااهلي بدأوا يوصلوا يباركولنا و لأني كنت زهقت من قعدتي في الاوضة فكنت بطول معاهم في الكلام وافتح مواضيع علشان يفضلوا قاعدين معنا اطول وقت .
وبعدها اهل سارة وصلوا وقعدنا معاهم وامها وخالتها وعمتها اخدوها ودخلوا اوضتنا وقعدت اتكلم مع حمايا واخواته .
خلص اليوم بعد ما حسيت انه يوم طويل جدا وبعدها دخلنا اوضتنا .
امي دخلتلنا العشا واتعشينا و مسكت الموبايل قعدت العب فيه وهي قاعدة علي السرير ولسه مش نامت من البارح .
كان واضح عليها الارهاق وقلة النوم اوي فاخدت المرتبة والمخدة علي الارض وقولتلها : بلاش تذنبي نفسك بالشكل ده نامي واطمني علشان انا لسه مش هنام دلوقتي .
قالتلي : لأ انا لسه مش جايني نوم .
: علفكرة انتي بتكدبي ، واضح عليكي اوي انك بتنامي علي نفسك .
: طيب انا هحاول انام .
نامت بردو وكانت لابسه هدوم وكتير وصعبت عليا فقولتلها : هاتي ستارة كبيرة .
قالتلي : هتعمل بها ايه ؟
: هعلقها علشان تداري السرير وتعرفي تنامي بحريتك .
ضحكت وقامت جابت الستارة وكانت بتبص لي ومبسوطة وانا بعلق الستارة .
كانت الليلة دي افضل من الليلة الاولي لأني حسيت ان سارة نامت فعلا وانا بعد ما لعبت بالموبايل شوية نمت انا كمان لحد الصبح .
ومن قلة النوم كنا نايمين ومش حاسين بأي حاجة لدرجة اني اتفاجئت بسارة بتفتح باب الاوضة بعد ما خبطت امي كتير علي الباب علشان تدخلنا الفطار .
بمجرد ما فتحت سارة الباب امي صرخت وقالت : ايه اللي انتوا عاملينه ده ؟!!
قومت مفزوع لقيت امي بتقولي : انت نايم علي الارض يا سيد الرجالة و سايبها نايمة علي السرير وحطه ستارة كمان علشان تداري نفسها !!!
: يامه بالراحه بس ، مش انتي عاوزانا نتجوز ادينا اتجوزنا ، سبينا بقي نعيش زي ما نحب .
: يعني انت حابب كده يا موكوس ؟
: يامه ملوش لزوم كلامك ده .
: مش عجبك كلامي !! هو انا لسه قولت حاجة !!
خرجت امي بسرعة وجريت اتصلت بأم سارة وقالتلها : تعاليلي دلوقتي حالا وهاتي جوزك معاكي .
